واشنگٹن (نیوزڈیسک) امریکہ میں مقیم 2 ہزار افغان شہریوں کے دہشتگرد تنظیموں سے روابط کا انکشاف ہوگیا، یہ بات امریکہ کی ڈائریکٹر نیشنل انٹیلی جنس تلسی گبارڈ کے ایک انٹرویو میں سامنے آئی ہے۔ امریکی میڈیا کو ایک انٹرویو میں انہوں نے بائیڈن انتظامیہ کے دور میں افغان شہریوں کی امریکہ آمد کے دوران جانچ پڑتال کے سست اور غیر مؤثر عمل پر کڑی تنقید کی اور کہا کہ افغانستان سے امریکہ منتقل ہونے والے تقریباً دو ہزار افغان شہریوں کے دہشت گرد تنظیموں سے براہ راست یا ممکنہ روابط ہیں، افغانستان سے امریکی فوج کے انخلا کے بعد آپریشن کے تحت تقریباً 18 ہزار افغان شہری امریکہ میں داخل ہوئے، تاہم ان میں سے بڑی تعداد کی جانچ مطلوبہ معیار کے مطابق نہیں کی گئی۔

تلسی گبارڈ کا کہنا ہے کہ بائیڈن انتظامیہ کے دوران مجموعی طور پر تقریباً دو لاکھ افغان شہری امریکا میں داخل ہوئے، اس عمل میں کوتاہیوں کی وجہ سے قومی سلامتی کو خطرات لاحق ہو سکتے ہیں کیونکہ دستیاب معلومات کے مطابق کم از کم دو ہزار ایسے افراد ہیں جن کے دہشت گرد تنظیموں، بشمول داعش اور القاعدہ، سے روابط یا ہمدردیاں پائی جاتی ہیں، ان میں بعض واقعات نے سیکیورٹی خدشات کو مزید بڑھا دیا، جن میں واشنگٹن ڈی سی میں نیشنل گارڈ کے اہلکاروں پر فائرنگ کا واقعہ بھی شامل ہے، جس کی تحقیقات دہشت گردی کے پہلو سے کی جا رہی ہیں، اگرچہ تاحال اس کیس میں باضابطہ دہشت گردی کے الزامات عائد نہیں کیے گئے۔
تلسی گبارڈ نے کہا کہ موجودہ صورتحال کے پیش نظر نیشنل کاؤنٹر ٹیررازم سینٹر، ہوم لینڈ سیکیورٹی اور ایف بی آئی کے تعاون سے بائیڈن دور میں آنے والے ہر افغان شہری کی دوبارہ جانچ کی جائے گی، یہ عمل قومی سلامتی کے تحفظ کے لیے ناگزیر ہے، کیونکہ داعش اور القاعدہ جیسی تنظیمیں اب بھی امریکی سرزمین پر حملوں کی منصوبہ بندی میں سرگرم ہیں اور ایسے افراد کی تلاش میں رہتی ہیں جو ان منصوبوں کو عملی جامہ پہنا سکیں۔