راولپنڈی (نیوزڈیسک) جی ایچ کیو میں چیف آف ڈیفنس فورسز فیلڈ مارشل عاصم منیر کے اعزاز میں گارڈ آف آنر کی تقریب کا انعقاد کیا گیا۔ تفصیلات کے مطابق اس تقریب میں چیف آف آرمی سٹاف و چیف آف ڈیفنس فورسز فیلڈ مارشل عاصم منیر کو تینوں مسلح افواج کے دستے کی طرف سے گارڈ آف آنر پیش کیا گیا، یہ تقریب بطور پاکستان کے پہلے چیف آف ڈیفنس فورسز تعینات ہونے پر فیلڈ مارشل سید عاصم منیر کے اعزاز میں منعقد کی گئی۔

بتایا گیا ہے کہ تقریب میں چیف آف دی نیول سٹاف اور چیف آف ائیر سٹاف ائیر چیف مارشل ظہیر احمد بابر سدھو سمیت اعلیٰ عسکری افسران بھی شریک ہوئے، اس تقریب میں تینوں مسلح افواج کے گارڈز پر مشتمل اعزازی دستے کی جانب سے مہمان خصوصی کو جنرل سلامی پیش کی گئی جب کہ مہمان خصوصی فیلڈ مارشل سید عاصم منیرکی جانب سے اعزازی دستے کا معائنہ بھی کیا گیا، بعد ازاں آڈیٹوریم میں معرکۂ حق کے دوران شاندار خدمات انجام دینے والے پاک فضائیہ کے پائلٹس اور پاک بحریہ کے آفسران کو چیف آف ڈیفنس فورسز جنرل عاصم منیر کی جانب سے سووینئرز پیش کیے گئے۔